හැංගිමුත්තන් කරන දොස්තර රාජිත
හිටපු ධීවර ඇමැති රාජිත සේනාරත්න මහතා දුරකථනය ද විසන්ධි කර සිය නිවස අතහැර ගොස් ඇති බව අල්ලස් කොමිසමේ ප්‍රකාශකයෙක් පවසනවා.
ඔහු අත්අඩංගුවට ගැනීමට ඊයේ (13) දිනයේ කිහිපවරක් උත්සාහ කළ බව ද ඔහු කියා සිටියා.
ඔහු නීතිමය ක්‍රියා පටිපාටියට පටහැනි ලෙස කිරින්ද ධීවර වරායේ වැලි කැණීම් ව්‍යාපෘතියක් කොරියානු සමාගමකට පැවරීම තුළින් රජයට රුපියල් ලක්ෂ 262කට අධික පාඩුවක් කිරීමේ සිද්ධියේ සැකකරුවකු ලෙස නම්කර ඇති අතර ඒ සම්බන්ධයෙන් අල්ලස් කොමිසම වෙත පැමිණ ප්‍රකාශයක් ලබා දෙන ලෙස දැනුම් දුන්නද එහි නොපැමිණීම හේතුවෙන් අත්අඩංගුවට ගැනීමට තීරණය කළ බව ද වැඩ්දුරටත් ඔහු පවසා සිටියා.
හිටපු අමාත්‍යා රාජිත සේනාරත්න අත්අඩංගුවට ගැනීමට කණ්ඩායම් කිහිපයක් වෙන් වෙන් වශයෙන් යොදවා ඇති බවත් ප්‍රකාශකයා සඳහන් කළා.
මෙම විමර්ශනයට අදාළව ප්‍රකාශයක් ලබා දෙන ලෙස අවස්ථා කිහිපයකදීම ඔහුට දැනුම්දීම් කර තිබුණත් ඔහු විවිධ අසත්‍ය කරුණු ඉදිරිපත් කරමින් දිගින් දිගටම එම ප්‍රකාශ ලබාදීම මඟ හරිමින් සිටින බව ද කොමිසම කියා සිටියි.
රාජිත සේනාරත්න මහතා අසනීප තත්ත්වයෙන් පෙළෙන බවට සඳහන් වෛද්‍ය වාර්තාවක් නීතිඥවරයකු මාර්ගයෙන් අල්ලස් කොමිසම වෙත ඉදිරිපත් කර ඇති අතර එහි කිසිදු නීතිමය පිළිගැනීමක් දක්නට නොලැබෙන බවත් ඔහු කියා සිටියා.
රටින් බැහැරව සිටින බවට රාජිත සේනාරත්න මහතා ප්‍රකාශ කර තිබෙන බවත් විවිධ අසත්‍ය කරුණු දක්වමින් කොමිසම මඟහරිමින් සිටින මෙම සැකකරු අත්අඩංගුවට ගැනීමට වරෙන්තුවක් නිකුත් කරන ලෙසත් පසුගියදා අල්ලස් කොමිසමේ නිලධාරීන් අධිකරණයට කරුණු දක්වමින් කියා සිටියා.
මෙම සිද්ධියට සම්බන්ධ සැකකරුවන් අත්අඩංගුවට ගැනීමට අල්ලස් කොමිසමට බලය තිබෙන බව මෙහි දී මහේස්ත්‍රාත්වරිය පෙන්වාදී ඇති අතර කොමිසමට පැවරී ඇති බලතල උපයෝගී කර ගනිමින් මෙම සැකකරු අත්අඩංගුවට ගෙන ඉදිරිපත් කරන ලෙස නියෝග කර තිබුණා.
මෙහි දී නිල නොළත් ආරංචි මාර්ග පෙන්වා දුන්නේ රාජිත සේනාරත්න මහතා සිය නීතිඥවරුන් මාර්ගයෙන් අධිකරණයට ඉදිරිපත් වීමට නියමිත බවයි.
