දරුවන්ට අසාධාරණයක් වන්නේ නම් දැනට තිබෙන නීති රීති ප්රමාණවත්
මෙරට දරුවන්ට යම් අසාධාරණයක්, අගතියක් වන්නේ නම්, ඊට එරෙහිව ක්රියාත්මක වීමට අලුත් නීති රීති පනත් ගෙන එන්නට පෙර අද තිබෙන නීති රීති ප්රමාණවත් බව ජාතික නිදහස් පෙරමුණේ නායක, හිටපු පාර්ලිමේන්තු මන්ත්රී විමල් වීරවංශ මහතා පවසනවා.
ජාතික නිදහස් පෙරමුණේ බත්තරමුල්ල කාර්යාලයේදී ඊයේ (29) පැවැති මාධ්ය හමුවට එක්වෙමින් වීරවංශ මහතා මේ බව කියා සිටියා.
දරුවකුට මානසිකව හෝ කායිකව යම් හිංසනයක් වන්නේ නම්, ඒ ගැන පැමිණිලි කිරීමට හොඳ “ඔම්බුඩ්ස්මන්” පදවියක් දැන් තිබෙන නීතිය අනුව අධ්යාපන කලාප කාර්යාලවලින් පවා පත් කළ හැකි බව ඔහු පැවසූවා.
දරුවන්ගේ මානසික පීඩනය හා මානසික අසහනය ඇති වන්නේ ගුරුවරුන් නිසාවත් මවුපියන් නිසාවත් නොවන ඊට හේතුව ‘කට පාඩම් කිරීමේ සංස්කෘතියට අනුව ගොඩනැඟුණු අධ්යාපන ක්රමය නිසා බව පැවසූවා.
ඒ මහතා වැඩිදුරටත් පැවසූවේ,
“දරුවකුට ඉහළට යෑමට ‘සාම්ප්රදායික කලා, වාණිජ, විද්යා, ගණිත හා තාක්ෂණ’ විෂය ධාරාවන්ට අමතරව ‘හැකියාව’ හා ‘දක්ෂතාව“ උරගා බලන අධ්යාපන ක්රමවේදයක් අවශ්යයි.
අධ්යාපන ක්ෂේත්රයේ එම වෙනස්කම් ඇති නොකර මේ ආකාරයෙන් නීතිය හා අණ පනත් මඟින් ගුරුවරුන්ගේ හා මවුව්පියන්ගේ අත් බැඳ දමන්නට කටයුතු කරයි නම්, කොණ්ඩ වවාගෙන, ටැටූ කොටාගෙන, කොට ඇඳුම් ඇඳගෙන පාසල් එන දරු පරපුරක් අනාගතයේදී බිහි වේවි.
මේ ප්රශ්නයත් සමඟ අද සමාජයේ විශාල වශයෙන්, විශේෂයෙන්ම මවුපියන්ගේ, ඒ වගේම ගුරු මහත්ම මහත්මීන්ගේ විශාල කැලඹීමක් ඇති වෙලා තිබෙනවා. මේ රටේ පාසල් පද්ධතිය සහ දරුවන්ගේ ආරක්ෂාව කොයි විදිහේ අභියෝගයකට, තර්ජනයකට මුහුණ දෙන්න නියමිත ද කියන ප්රශ්නය ඔවුන් අතර සාකච්ඡාවට ලක්වෙමින් තිබෙනවා.
අනිත් පැත්තෙන් අපි දන්නවා දරුවකුට ‘අවමන්’ කිරීම කියලා මේකේ දඬුවම් ලැබෙන වරදක් බවට පත්වෙනවා. හැබැයි ‘අවමානය’ යන්නට පිළිබඳ නිශ්චිත අර්ථකථනයක් නෑ. ‘ශාරීරික නොවන ක්රියා’ කියලා මේකේ සඳහන් වෙනවා; මේ ශාරීරික නොවන ක්රියා කියන්නේ මොනව ද කියලා මේකේ අර්ථකථනයක් නෑ. අනිත් එක මේක පාසල් පද්ධතියට බලපාන්නේ නෑ, ගුරුවරුන්ට බලපාන්නේ නෑ, මවුපියන්ට බලපාන්නේ නෑ කියලා මේ පනතේ කොහෙවත් සඳහන් වෙන්නේත් නැහැ.
අපි කොහොම ද එහෙම කියන්නේ? දරුවකුට කිසියම් ගුරුවරයෙක් හරි කාගේ හරි අතින් මානසික හිංසනයක් වෙනවා නම්, විශේෂයෙන්ම පාසල් පද්ධතියේදී, ඒකට පුළුවන් කලාප අධ්යාපන කාර්යාලය ඇතුළේ ඔම්බුඩ්ස්මන් කෙනෙක් දාන්න. විශ්රාමික හොඳ විදුහල්පතිවරයෙක් හෝ දෙතුන් දෙනෙක් තෝරලා ‘ඔම්බුඩ්ස්මන්’ කියලා පදවියක් ඇති කරලා, කලාප අධ්යාපන කාර්යාලයේ ඒ තනතුරේ ඉන්න කෙනාට පැමිණිලි කරන්න, කියන්න පුළුවන්.
එතුමා පරීක්ෂණයක් කරලා, ගුරුවරයා ඒකෙදි වැරදි නම්, ඊට අදාළව වැඩ තහනම් කරන්න පුළුවන් මාසයක් දෙකක්. ඒ විදිහට කරන්න පුළුවන්. නැතුව මේ ගුරුවරුන්වත්, මවුපියන්වත් උසාවි ගෙනියන්න නෙවෙයි ඕනෑ. මේකෙන් වෙන්නේ හෙට දවසේ පාසලට නොගැළපෙන විදිහට කොණ්ඩේ පාට කරගෙන ආවත්, ටැටූ කොටාගෙන ආවත්, කනේ කරාබු දාගෙන ආවත් පිරිමි ළමයි, මොන විදිහේ අවකල් ක්රියාවක් කළත් ඒ සම්බන්ධයෙන් ක්රියාත්මක වෙන්න ගුරුවරුන්ට කිසිම හැකියාවක් නැති වෙනවා”
