ප්රංශයේ දකුණු අප්රිකානු තානාපති අබිරහස් ලෙස මිය යයි
ප්රංශයේ දකුණු අප්රිකානු තානාපති නෙති එම්තෙත්වා පැරිස් නුවර සුඛෝපභෝගී හෝටලයක් අසල අබිරහස් ලෙස මියගොස් සිටියදී පොලීසිය විසින් සොයා ගනු ලැබූ බව විදෙස් මාධ්ය වාර්තා කරනවා.
58 හැවිරිදි තානාපතිවරයා අතුරුදන් වූ බවට පසුගිය සඳුදා ඔහුගේ බිරිය පොලීසියට පැමිණිලි කර ඇති අතර, තානාපතිවරයාගේ මළ සිරුර ඔහු නවාතැන් ගෙන සිටි පැරිස් නුවර හයාට් රිජන්සි හෝටලය අසළදී පොලිස් නිලධාරීන් සොයා ගනු ලැබුවේ ඊට පසුදින බව ද විදෙස් මාධ්ය වැඩිදුරටත් වාර්තා කරයි.
දකුණු අප්රිකානු තානාපතිවරයා එම හෝටලයේ 22 වැනි මහලේ පිහිටි කාමරයක නවාතැන් ගෙන සිටි බවත්, එම කාමරයේ ආරක්ෂිත කවුළු විවෘත කර තිබූ බවත් පොලීසිය ප්රකාශ කර තිබෙනවා.
තානාපතිවරයාගේ මරණයට හේතුව මෙතෙක් අනාවරණය වී නැති අතර, එය සිය දිවි හානි කරගැනීමක් විය හැකි බව අනුමාන කර තිබේ. ඔහුගේ මරණය පිළිබඳ පැරිස් නුවර පොලීසිය වැඩිදුර විමර්ශන සිදු කරන බව ද වාර්තා වේ. දකුණු අප්රිකානු ජාතික කොන්ග්රසයේ ප්රබල සාමාජිකයකු වන නෙති එම්තෙත්වා මීට පෙර දකුණු අප්රිකානු රජයේ කලා සහ සංස්කෘතික කටයුතු ඇමැතිවරයා ලෙසත්, පොලීසිය භාර ඇමැතිවරයා ලෙසත් කටයුතු කර ඇති අතර, ප්රංශයේ දකුණු අප්රිකානු තානාපතිවරයා ලෙස පත්වී ඇත්තේ 2023 වසරේ දෙසැම්බර් මාසයේදී බව විදෙස් මාධ්ය සඳහන් කරයි.
