හිරේ දැම්මට මිනිස්සුන්ගේ බඩ පිරෙන්නේ නෑ
ජනතා ආර්ථිකය සුවපත් කළ හැකි වැඩපිළිවෙළක් සර්වජන බලය ආණ්ඩුවකින් ගෙන එන බව සර්වජන බලය සභාපති, හිටපු පාර්ලිමේන්තු මන්ත්රී රොෂාන් රණසිංහ මහතා පවසනවා.
සභාපතිවරයා මේ බව පැවසුවේ මැදිරිගිරිය ආසනයේ, අල්හිලාල්පුර කොට්ඨාසයේ සර්වජන සභාව පිහිටුවීමේ අවස්ථාවට එක් වෙමින්.
එහිදී වැඩිදුරටත් අදහස් දැක්වූ සභාපතිවරයා මෙලෙස පැවසූවා.
“ආණ්ඩුවට වසරක් ගෙවී අවසන්. ආණ්ඩුවක් ගත්තාම, එම ආණ්ඩුව සාර්ථක ලෙස අවුරුදු පහ ගෙන යන්න නම් බලය ගත් පළමු වැනි දවසේම දැනෙන වැඩ කොටසකින් පටන් ගන්න ඕනෙ. එහෙම කිසිදු දැනෙන වැඩපිළිවෙළක් මේ ආණ්ඩුවෙන් අපට පේන්න නෑ. අද මිනිස්සු කබලෙන් ළිපට වැටිලා ඉන්නේ. වැරැද්දක් කළ මිනිහෙක් ඉන්නවා නම් හිරේ දැම්මට කමක් නෑ. හැබැයි එහෙම හිරේ දැම්මට මිනිසුන්ට ඒකෙන් කන්න බෑ. බඩ පිරෙන්නේ නෑ. ප්රශ්න විසඳෙන්නේ නෑ. උද්ධමනය වැඩි වෙලා. ආර්ථික වේගය අඩු වෙලා. ඔබට මිලදී ගැනීමේ හැකියාව කොතැනද තිබෙන්නේ කියලා හිතා බලන්න. මිලදී ගැනීමේ හැකියාව දුර්වල වෙනවයි කියන්නේ රටක් කඩා වැටෙනවා. මේ ආණ්ඩුවට ඒ වෙනුවෙන් වැඩපිළිවෙළක් තියෙනවා නම් අපි කුහක නැතුව ඒකත් කියනවා. අපි ප්රාර්ථනා කරන්නේ ඉතිරි අවුරුදු හතරෙවත් වැඩක් කරන්න ලැබෙන්න කියලා. එහෙම නැතුව මැතිවරණයකට ගියාම ආණ්ඩුව ජනතාවට මොනවද කියන්නේ. ගමට ගිහින් කියන්න වෙන්නේ අපි අරයා හිරේ දැම්මා, මෙයා හිරේ දැම්මා කියන එක විතරයි. මේ රට ගැලවුමකට ගේන්න පුළුවන් නිෂ්පාදන ආර්ථිකයකින් පමණයි. අපි දකින්නේ නෑ ඒ සඳහා කිසිම කර්මාන්තයක් ඇති වෙනවා. පසුගිය ආණ්ඩු ඒ ඒ කාලෙට ඔවුන්ගේ පැවැත්මට විවිධ දේ ගේනවා. ජනසවිය දුන්නා. සමෘද්ධිය දුන්නා. දැන් අස්වැසුම දෙනවා. මේ එකකින්වත් ජනතාව ආර්ථික වශයෙන් එගොඩ කිරීමේ වැඩපිළිවෙළක් නෑ. හැමදාම හිඟන්නෝ කරන වැඩපිළිවෙළ පමණයි තිබිලා තිබෙන්නේ. මේක වෙනස් කර ආර්ථිකය ගොඩ ගත හැකි නිෂ්පාදන ආර්ථිකයක් හැදිය යුතුයි. ව්යවසායකත්වය මත පමණයි රට සමෘද්ධිය කරා ගෙන යන්න පුළුවන්. ඔබේ ආර්ථිකය සුවපත් කළ හැකි වැඩපිළිවෙළක් සර්වජන බලය ආණ්ඩුවක් තුළ ගේනවා. ස්ථිර වශයෙන් ආණ්ඩුවක් හදනවා. ඒ සඳහා අවශ්ය වැඩපිළිවෙළ අප සතුව තිබෙනවා. ඒ සඳහා ඔබේ සහයෝගය දෙන්න.”
