අනියම් ඇසුරක් නිසා යුවළකට හිම් වූ වේවැල් පහර
ඉස්ලාමීය ෂරියා නීතිය උල්ලංඝනය කරමින් අනියම් ලිංගික ඇසුරක් පැවැත්වීමේ සහ මත්පැන් පානය කිරීමේ චෝදනාවකට හසුවූ ඉන්දුනීසියාවේ තරුණ යුවළකට ප්රසිද්ධියේ වේවැල් පහර 140ක දඬුවමක් ලබා දී ඇතැයි විදෙස් මාධ්ය වාර්තා කරනවා.
එම දඬුවමට ලක්වී ඇත්තේ ඉන්දුනීසියාවේ සුමාත්රා දූපතේ අචේ ප්රාන්තයේ පදිංචි තරුණ යුවළක් බවත්, නගර මධ්යයේ පිහිටි උද්යානයක මහජනතාව ඉදිරියේදී ප්රාන්තයේ ෂරියා ආගමික පොලිස් නිලධාරීන් විසින් එම දඬුවම ලබා දී ඇතැයි ද වාර්තා වේ.
අනියම් ලිංගික ඇසුරක් පැවැත්වීමේ වරදට වේවැල් පහර 100ක් සහ මත්පැන් පානය කිරීමේ වරදට වේවැල් පහර 40ක් බැගින් දෙදෙනාටම ලබා දී ඇති අතර, දඬුවමට ලක්වූ 21 හැවිරිදි තරුණිය සිහිසුන්වීම හේතුවෙන් රෝහල්ගත කිරීමට ද සිදුවී ඇතැයි විදෙස් මාධ්ය වැඩිදුරටත් වාර්තා කරනවා.
ලොව විශාලතම මුස්ලිම් රාජ්යය වන ඉන්දුනීසියාවේ ප්රසිද්ධියේ වේවැල් පහර ලබාදීමේ දඬුවම ඇතුළුව ෂරියා නීතිය ක්රියාත්මක වන එකම ප්රාන්තය ද අචේ වන අතර, එය එරට මානව හිමිකම් සංවිධානවල දැඩි විවේචනයට ද ලක්වී තිබේ.
අවිවාහක තරුණ යුවළට අමතරව තවත් 6 දෙනකුට එදින ප්රසිද්ධියේ වේවැල් පහරේ දඬුවම ලබාදී ඇති අතර, අචේ ප්රාන්තයේ ආගමික පොලීසියේ නිලධාරියකු ද දඬුවමට ලක්වී ඇතැයි වාර්තා වේ.
ඔහුට එම දඬුවම හිමිවී ඇත්තේ තරුණියක සමඟ පොදු ස්ථානයක අවිනීත ලෙස හැසිරීමේ චෝදනාවට බවත්, දෙදෙනාටම වේවැල් පහර 23 බැගින් ලබා දී ඇති බවත් විදෙස් මාධ්ය සඳහන් කරයි.
