රටෙන් පලාගිය ඇෆ්ගන් ක්‍රිකට් ක්‍රීඩිකාවන් හට ලෝක කුසලානයට වරම්
ඇෆ්ගනිස්තානයේ තලේබාන් පාලනය හේතුවෙන් පලා ගිය ඇෆ්ගන් කාන්තා ක්‍රිකට් ක්‍රීඩිකාවන්ට මේ වසර අගදී ශ්‍රී ලංකාවේ හා ඉන්දියාවේ පැවැත්වෙන කාන්තා ඕවර 50 ලෝක කුසලාන තරගාවලියට සහ 2026දී එංගලන්තයේ පැවැත්වෙන කාන්තා විස්සයි20 ලෝක කුසලාන තරගාවලියට ක්‍රීඩා කිරීමේ අවස්ථා ලබාදීමට ජාත්‍යන්තර ක්‍රිකට් කවුන්සිලය තීරණය කර ඇත.
තලේබාන් දැඩි නීති හමුවේ ඔස්ට්‍රේලියාවට පලා ගිය ඇෆ්ගනිස්තාන කාන්තා ක්‍රිකට් ක්‍රීඩිකාවන්ට උපකාර කිරීම සඳහා ලොව ධනවත්ම ක්‍රිකට් මණ්ඩල තුන වන ඉන්දියාව, එංගලන්තය සහ ඔස්ට්‍රේලියාව කැමැත්ත පළ කොට ඇති බව සිංගප්පූරුවේදී පෙරේදා (20) පැවති අයිසීසී වාර්ෂික සමුළුවේදී අනාවරණය කෙරිණි.
2021දී තලේබාන්වරු ඇෆ්ගනිස්තානයේ බලය අත්පත් කර ගැනීමෙන් පසු කාන්තාවන්ට ක්‍රිකට් ඇතුළු ක්‍රීඩා තහනමක් පැනවූ අතර, අවතැන් ක්‍රීඩිකාවන් ඔස්ට්‍රේලියා‍වේ සිට ක්‍රීඩා කිරීමේ අවස්ථා ලබාදෙන ලෙස අයිසීසීයෙන් ඉල්ලීමක් කළේය. අයිසීසී නියෝජ්‍ය සභාපති ඉම්රාන් ක්වාජා මහතාගේ අධීක්ෂණය යටතේ, ඉන්දීය ක්‍රිකට් පාලක මණ්ඩලය, එංගලන්ත සහ වේල්ස් ක්‍රිකට් මණ්ඩලය සහ ක්‍රිකට් ඔස්ට්‍රේලියා සමඟ සහයෝගයෙන් කටයුතු කිරීමේ අවස්ථා ඇෆ්ගනිස්තාන කාන්තා ක්‍රිකට් කණ්ඩායමට ලබාදී ඇත. ඇෆ්ගනිස්තාන කාන්තා ක්‍රිකට් ක්‍රීඩිකාවන්ට සහයෝගය දැක්වීමට සහ ගෝලීය ක්‍රිකට් රාමුව තුළ ඔවුන්ගේ අනාගතය සැලසුම් කිරීමට හරාරේහි කලින් පැවති රැස්වීමකදී මණ්ඩල තුන එකඟවී තිබිණි.
අයිසීසී ලෝක කුසලාන ක්‍රිකට් තරගාවලි දෙක අතරතුරදී ඇෆ්ගනිස්තාන කාන්තා ක්‍රිකට් ක්‍රීඩිකාවන්ට අයිසීසී අනුග්‍රහය යටතේ ජාත්‍යන්තර පුහුණුකරුවන් විසින් පවත්වනු ලබන වැඩමුළුවලට සහභාගී වීමට අවස්ථා හිමිව තිබේ.
