සෞඛ්ය ඇමැතිවරුන්ගේ දූෂණ හා වංචා හෙළි නොකරන වර්තමාන බලධාරින්
හිටපු සෞඛ්ය ඇමැතිවරුන් වන පවිත්රා වන්නිආරච්චි, චන්න ජයසුමන සහ කෙහෙළිය රඹුක්වැල්ල මහත්ම මහත්මීන්ගේ පාලන කාලයේදී සෞඛ්ය අමාත්යාංශය තුළ සිදුවූ දූෂණ හා වංචා සම්බන්ධයෙන් දිගින් දිගටම විගණනය කරුණු විමසන නමුත් අදාළ කරුණු ලබා දීමට වර්තමාන සෞඛ්ය බලධාරීන් කටයුතු නොකරන බවට නවතම විගණන වාර්තාවන්ට අනුව හෙළිවී තිබෙනවා.
එම නිසා ඒ සම්බන්ධයෙන් වහාම විමර්ශනයක් පවත් වන ලෙසට වෛද්ය හා සිවිල් අයිතිවාසිකම් පිළිබඳ වෛද්යවරුන්ගේ වෘත්තීය සමිති සන්ධානයේ සභාපති විශේෂඥ වෛද්ය චමල් සංජීව මහතා අපරාධ පරීක්ෂණ දෙපාර්තමේන්තුවෙන් ඉල්ලීමක් කර තිබෙනවා.
කොවිඩ් එන්නත් ලක්ෂ හැත්තෑවක් පමණ සීමාව ඉක්මවා මිලදී ගැනීමෙන් රජයට ඩොලර් මිලියන 70කට අධික පාඩුවක් සිදුවීම සම්බන්ධව විගණකාධිපතිවරයා දිගින් දිගටම කරුණු විමසා ඇත. නමුත් වර්තමාන සෞඛ්ය බලධාරීන් අදාළ කරුණු වසන් කරන බවට නවතම විගණන වාර්තාව සඳහන් කර ඇතැයි ද වෛද්ය චමල් සංජීව මහතා පැවසුවා.
මෙම කාලසීමාවේදී සෞඛ්ය අමාත්යාංශයේ නිලතල දැරූ වර්තමාන සෞඛ්ය ලේකම් අනිල් ජාසිංහ මහතා සහ වෛද්ය අසේල ගුණවර්ධන මහතා ඇතුළු සෞඛ්ය අධ්යක්ෂ ජනරාල්වරුන් මේ ආකාරයට තොරතුරු ලබා නොදී සිටීම හරහා පසුගිය කාලසීමාවේදි සිදු වූ බොහෝ දූෂණ යටපත් විය හැකි බව පෙන්වා දෙයි.
මේ සම්බන්ධයෙන් පුළුල් විමර්ශනයක් සිදු කරන ලෙසට වෛද්ය චමල් සංජීව මහතා අපරාධ පරීක්ෂණ දෙපාර්තමේන්තුවේ අධ්යක්ෂ ශානි අබේසේකර මහතාගෙන් පෙරේදා (19) ඉල්ලීමක් කර තිබෙනවා.
ශ්රී ලංකා ක්රිකට් ආයතනය සහ විදේශ සේවා නියුක්ති කාර්යාංශය මඟින් ඖෂධ මිලදී ගැනීම සඳහා පරිත්යාග කළ රුපියල් මිලියන 900කට ආසන්න මුදලක් අවභාවිත වී ඇති බවට විගණනය මඟින් පෙන්වා දෙන කරුණ සම්බන්ධයෙන් විමර්ශනයක් සිදු කරන ලෙස ද ඔහු ඉල්ලීමක් කළා.
සෞඛ්ය අමාත්යාංශය, රාජ්ය ඖෂධ සංස්ථාව, ඖෂධ නියාමන අධිකාරිය, වෛද්ය සැපයුම් ඒකකය හා රට පුරා ප්රධාන පෙළේ රෝහල් 25ක දූෂණ සම්බන්ධව නවතම විගණන වාර්තාවෙන් පෙන්වා දුන් කරුණු සම්බන්ධයෙන් නිසි අවධානයක් යොමු කිරීමට ජනාධිපතිවරයා ද කටයුතු කළ යුතු බව ද අවධාරණය කරයි.
එසේ නොවන්නේ නම්, මෙම දූෂිත නිලධාරීන් සමඟ සෞඛ්ය පද්ධතිය ගොඩනැඟිය නොහැකි බවට ජනාධිපතිවරයාට අවබෝධ විය යුතු බවත් වෛද්ය චමල් සංජීව මහතා අපරාධ පරීක්ෂණ දෙපාර්තමේන්තුව ඉදිරිපිට මාධ්ය සාකච්ඡාවක් පවත්වමින් ප්රකාශ කළා.
