වැලිගම සභාපති ඝාතනයේ සැකකරුවන් FCID භාරදෙයි
වැලිගම ප්රදේශීය සභාවේ සභාපති ඝාතනය සම්බන්ධයෙන් අත්අඩංගුවට ගත් ප්රධාන සැකකරු, සෙසු සැකකරුවන් හා සැකකාරිය වැඩිදුර විමර්ශන සඳහා මූල්ය අපරාධ විමර්ශන කොට්ඨාසය (FCID) වෙත භාර දී තිබෙනවා.
නිවේදනයක් නිකුත්කරමින් පොලිස් මාධ්ය අංශය පවසා සිටියේ, එම කොට්ඨාසය මගින් වැඩිදුර විමර්ශන සිදු කරන බවයි.
මෙම ඝාතනය සම්බන්ධයෙන් සැකකරුවන් දෙදෙනෙක් සහ සැකකාරියක් කැකිරාව ප්රදේශයේදී ඊයේ (26) අළුයම දී අත්අඩංගුවට ගෙන තිබුණා.
එම අවස්ථාවේ දී පලාගිය ප්රධාන සැකකරු අද සවස මහරගම නාවින්න ප්රදේශයේදී විශේෂ විමර්ශන කණ්ඩායමක්, පොලිස් විශේෂ කාර්ය බලකාය, රාජ්ය බුද්ධි සේවයේ නිලධාරීන් හා ප්රාදේශීය පොලිස් නිලධාරීන් කණ්ඩායමක් එක්ව සිදුකළ ඒකාබද්ධ මෙහෙයුමකින් අත්අඩංගුවට ගත්තා.
වැලිගම ප්රාදේශීය සභාවේ සභාපතිවරයා වෙඩිතබා ඝාතනය කිරීමේ සිදුවීම සම්බන්ධව පොලිස් කණ්ඩායම් කිහිපයක් මගින් විමර්ශන සිදුකරනු ලබනවා.
මෙම ඝාතනයට අදාළ විමර්ශන කටයුතු පොලිස්පතිවරයාගේ පූර්ණ අධීක්ෂණය යටතේ මෙහෙයවේ.
ඒ සඳහා ජ්යෙෂ්ඨ නියෝජ්ය පොලිස්පති දකුණු පළාත, ජ්යෙෂ්ඨ නියෝජ්ය පොලිස්පති බස්නාහිර පළාත, ජ්යෙෂ්ඨ නියෝජ්ය පොලිස්පති අපරාධ පරීක්ෂණ දෙපාර්තමේන්තුව, රාජ්ය බුද්ධි සේවය, අණදෙන නිලධාරී පොලිස් විශේෂ කාර්ය බලකාය, නියෝජ්ය පොලිස්පති කොළඹ දිසාව, නියෝජ්ය පොලිස්පති බස්නාහිර පළාත දකුණ, අධ්යක්ෂ මූල්ය අපරාධ විමර්ශන කොට්ඨාසය, අධ්යක්ෂ අපරාධ වාර්තා කොට්ඨාසය හා අධ්යක්ෂ දක්ෂිණ අධිවේගී මාර්ග සංචාරක කොට්ඨාස මගින් ඒකාබද්ධ මෙහෙයුමක් ලෙස ක්රියාත්මක කරනු ලැබුවා.
