එජාපයෙන් ගිහින් සජබය හැදූ අය නැවත එජාපයට ඒම වළක්වන්න බැහැ
එක්සත් ජාතික පක්ෂයත්, සමගි ජන බලවේගයත් එකතු නොවුණොත් එදා එක්සත් ජාතික පක්ෂයෙන් ගිහින් සජබෙ හදපු පාක්ෂිකයන් නැවතත් සජබෙ අතහැරලා එක්සත් ජාතික පක්ෂයට එකතු වීම වැළැක්විය නොහැකි බව එක්සත් ජාතික පක්ෂයේ නියෝජ්ය නායක හරින් ප්රනාන්දු මහතා පවසනවා.
ඒ මහතා මේ බව පැවසුවේ එක්සත් ජාතික පක්ෂ නව නියෝජ්ය නායක ලෙස ඊයේ (10) පිටකෝට්ටේ සිරිකොත එජාප මූලස්ථානයේදී වැඩ භාර ගත් අවස්ථාවේදී.
එහිදී වැඩිදුරටත් අදහස් දක්වම්න් පැවසූවේ,
“එක්සත් ජාතික පක්ෂයේ නායකතුමා භාර දුන් අලුත් තනතුරේ වගකීම් අද මා භාර ගත්තා. හරියටම අවුරුද්දක කාලයක් දේශපාලනික වශයෙන් අපි කළ යුත්තේ කුමක්ද කියන දේ ගැන, එක්සත් ජාතික පක්ෂය කියන්නේ මොකක්ද කියන එක ගැන, එක්සත් ජාතික පක්ෂය රටට මොනවාද කර තියෙන්නේ කියන එක ගැන හිතුවා. නිදහස දිනා දීමට ඇරඹි එක්සත් ජාතික පක්ෂය අද තවත් කර්තව්යයකට උර දී සිටිනවා. එක්සත් ජාතික පක්ෂය කියන්නේ ප්රශ්නයක්, අර්බුදයක් පැන නැඟුණු සෑම මොහොතකම පක්ෂ පාට නොබලා සියලු දෙනා එකතු කරගෙන රටේ උන්නතියට කටයුතු කළ පක්ෂයක්.
වත්මන් ආණ්ඩුවට චෝදනා කරනවා වෙනුවට එක්සත් ජාතික පක්ෂයේ න්යාය, ප්රතිපත්තිය සමඟ අලුත් වැඩපිළිවෙළක් ඉදිරියට ගේන්න අපි සූදානම්. ආණ්ඩුවට දේශපාලනික දිශානතියක් නෑ. හරියට බැලුවොත් ආණ්ඩුව දක්ෂිණාංශිකයි. සමාජවාදය නෑ. එක්සත් ජාතික පක්ෂය හැමදාමත් දේශපාලන ප්රතිපත්තියක හිටියා. ඒ දේශපාලන ප්රතිපත්තිය තුළ පිහිටා රට පුරා අලුත් මුහුණුවරකින් එක්සත් ජාතික පක්ෂයේ දැවැන්ත බලවේගයක් ඉදිරි මාස හයේ නිර්මාණය කරනවා කියන පොරොන්දුව මේ අවස්ථාව ලබා දෙනවා.
සමගි ජන බලවේගය සමඟ එක්ව කටයුතු කරන්න අවශ්ය කටයුතු මේ වන විට සිදු වෙමින් පවතිනවා. අපි ඇතුළුව එක්සත් ජාතික පක්ෂයේ පාක්ෂිකයන් සමගි ජන බලවේගය නිර්මාණය කළා. පක්ෂ නායකයන්, තනතුරු දරන අය මොන මතයක් දැරුවත් එක්සත් ජාතික පක්ෂයටත්, සමගි ජන බලවේගයටත් එකතු වෙන්න කියලා ගමේ ඉල්ලීමක් තිබෙනවා. එහෙම නොවුණොත් එදා එක්සත් ජාතික පක්ෂයෙන් ගිහින් සජබෙ හදපු පාක්ෂිකයන් සජබෙ අතහැර එක්සත් ජාතික පක්ෂයට එකතු වන එක වළක්වන්න බෑ. අපි කියලා නෙවෙයි ගමේ සමුපකාර ඡන්දයට මිනිස්සු එකතු වුණේ. ගමේ මිනිස්සු අපට කියන්නේ නායකයන් එකතු වුණත්, නැතත් අපි එකතු වෙනවා කියන එකයි. අපි හිතනවා පක්ෂ නායකත්වය මේ සම්බන්ධයෙන් තීන්දු ගනියි කියලා.
රට තුළ ලොකු අර්බුදයක් නිර්මාණය වෙමින් තිබෙන මේ අවස්ථාවේ පොදු විපක්ෂයක අවශ්යතාව තිබෙනවා. එහිදී අපට අපේ මතය දරන්න පුළුවන්. හැබැයි පක්ෂ විදියට වෙන වෙනම කටයුතු කළ හැකියි. ලොකු අර්බුදයක් නිර්මාණය වෙමින් තිබෙන මේ අවස්ථාවේ අපි තීන්දුවක් ගත යුතුයි. මේ මස 21 වැනිදා තියෙන්නේ ඒ සමස්ත විපක්ෂයේම වැඩපිළිවෙළක්. මේ රැලිය සාර්ථක වෙයි. දේශපාලන බලය පෙරළන්න නෙවෙයි අපි එක්වෙන්නේ.
රනිල් වික්රමසිංහ හිටපු ජනාධිපතිවරයා සංචිතයක් තියලා ගිය නිසයි වාහන ගෙන්වන්න පුළුවන් වුණේ. තවම වාහනේට නම්බර් ප්ලේට් එක දෙන්න බෑ. උරුමය හිමිකම වුණා. අස්වැසුමටත් වෙන නමක් ගේන්න හදනවා. ඒ විදියට රනිල් වික්රමසිංහ මහතා කරගෙන ගිය වැඩපිළිවෙළ අපටත් වඩා දක්ෂිණාංශික විදියට දැන් ආණ්ඩුව කරගෙන යනවා.”
