නේපාලය කඩුලු 8කින් පැරද වූ ශ්රී ලංකා යොවුන් පිල
ආසියානු කුසලාන අවුරුදු 19න් පහළ එක්දින ක්රිකට් තරගාවලිය ආරම්භ කරමින් පැවති පළමු තරගයෙන් නේපාලයට එරෙහිව කඩුලු 8ක පහසු ජයක් ලැබූ ශ්රී ලංකා පිල අද (15) ඇෆ්ගනිස්තාන යොවුන් පිලට එරෙහිව පිටියට පිවිසෙනවා.
මූලික වටයේ දෙවැනි තරගය ලෙස ශ්රී ලංකා පිල එක්වන මේ තරගය අයිසීසී ඇකඩමි ක්රීඩාංගණයේදී මෙරට වේලාවෙන් පෙරවරු 10.30ට ආරම්භ කිරීමට නියමිතයි.
‘බී’ කාණ්ඩයෙන් තරග කරන ශ්රී ලංකා පිල නේපාලය පරදවමින් ප්රසාද ලකුණු පෙරමුණ ගෙන සිටින අතර, ඇෆ්ගනිස්තානය ඔවුන්ගේ පළමු තරගයෙන් බංග්ලාදේශය හමුවේ කඩුලු 3ක පරාජයක් ලැබුවා.
මේ අතර නේපාලයට එරෙහිව පෙරේදා පැවති තරගයේදී ප්රතිවාදීන් ලකුණු 82කට දවාගත් ශ්රී ලංකා පිල ඕවර 14.5කදී ජය හිමිකර ගත්තේ කඩුලු 2ක් පමණක් දැවී තිබියදීයි.
දිමන්ත මහවිතාන නොදැවී ලකුණු 39ක් සහ කවිජ ගමගේ නොදැවී ලකුණු 24ක් ඉනිමට එක් කළා.
සිබ්රින් ශ්රෙස්තා ලකුණු 18ක් රැස් කරමින් නේපාල ඉනිමේ වැඩිම ලකුණුලාභියා වූ අතර, ශ්රී ලංකා පන්දු යවන්නන් හමුවේ ඔහු සමඟ ලකුණු 10 සීමාවට පිවිසිය හැකි වූයේ තවත් පිතිකරුවන් දෙදෙනකුට පමණයි.
විශිෂ්ට පන්දු යැවීමක නිරත වූ සෙත්මික සෙනෙවිරත්න ඕවර 9.5කදී නිලකුණු ඕවරයක් ද සමඟ ලකුණු 25කට කඩුලු 5ක් බිඳ දැම්මා. මේ දස්කම හේතුවෙන් ඔහු තරගයේ වීරයා ලෙස ද නම් කෙරුණා.
දුල්නිත් සිගේරා, චාමික හීනටිගල, විග්නේස්වරන් ආකාශ් සහ රසිත් නිම්සර කඩුල්ල බැගින් දවා ගත්තා.
