ජනතා හිතවාදී තීන්දු කිසිව්ටෙක ආපසු හරවන්නේ නෑ
කුඩා කණ්ඩායම් විසින් 22 වැනි ව්යවස්ථා සංශෝධනය ගැන කියමින් ජනතාව බිය ගැන්වීමට උත්සාහ දැරුවද තමන් කිසිම විටෙක මෙරට පොදු ජනතාවට අගතියක් වන තීන්දුවක් නොගන්නා බව ජනාධිපති අනුර කුමාර දිසානායක මහතා ප්රකාශ කළා.
මින් අගතියක් වන්නේ පාතාලයට, මත් ජාවාරමුන්ට පමණක් බව කී ජනාධිපතිවරයා, මේවා පාලනයට නම් අපරාධ පරීක්ෂණ දෙපාර්තමේන්තුව, අල්ලස් කොමිසම, නීතිපති දෙපාර්තමේන්තුව, රස පරීක්ෂක දෙපාර්තමේන්තුව, අධිකරණ පද්ධතිය ශක්තිමත් කළ යුතු බවත්, නඩු ඉක්මන් කළ යුතු බවත් පැවසූවා.
මේ සියල්ල ඉටු කිරීමට තමන්ට කවුරු නැතත් ජනතා බලය තිබෙන බව කී ජනාධිපතිවරයා මේ තීන්දුව ගැනීමට පෙර තමන් ජනතාවගේ පැත්තෙන් හොඳට හිතන බවත් අනතුරුව ගනු ලබන ජනතා හිතවාදී තීන්දුව, කවදාවත් මොනම හේතුවක් නිසාවත් ආපසු හරවන්නේ නැති බවත් අවධාරණය කළා.
ජනාධිපති අනුර කුමාර දිසානායක මහතා මේ බව පැවසුවේ 42 වැනි මිලාද් උන් නබි දින රාජ්ය මහෝත්සවයට ඊයේ (26) එක්වෙමිනි. මීගමුව පෙරියමුල්ල අල්හිලාල් ජාතික පාසලේදී මේ උත්සවය පැවැත්වුණා.
එහිදී වැඩිදුරටත් අදහස් පළ කරමින් ජනාධිපතිවරයා මෙසේද ප්රකාශ කළා.
“නීතිය ඉදිරියේ සියලු දෙනා එක හා සමානයි යන සහතිකය ආණ්ඩුව රටට ලබාදී තිබෙනවා. ජාතිවාදී ගැටුම්වලින්, බොහෝ අය ඝාතනය වෙලා තිබෙනවා.
මිය ගොස් තිබෙනවා. යළි කිසිදා ජාතිවාදි ගැටුමක් ඇති වෙන්නට ඉඩ නොදෙන බවට මම සහතික වෙනවා. බොහෝ අය ජාතිවාදි ගැටුම්වල වින්දිතයන් වෙලා ඉන්නවා. ආණ්ඩුව විදියටත් දේශපාලන පක්ෂයක් විදියටත් ඒවාට ඉඩ නෙදෙන බව මම වගකීමෙන් ප්රකාශ කරනවා. දියුණු රාජ්යයක් ගොඩනගන්න අපේ රටේ සම්පත් හොඳටම ඇති. ඊට දමා ගත යුතු ශක්තිමත් අත්තිවාරම් තිබෙනවා. මුලින්ම කරන්න ඕන සියලු ජාතින් සමානාත්මතාව ඇතිව පිහිටුවා ජාතිවාදය ප්රතික්ෂේප කර ජාතික සමගිය ඇති කිරිමයි. ජාතික සමගිය තමයි පළමුවැනි කුලුන විය යුතු වන්නේ. නීතිය ඉදිරියේ හැමෝම සමාන බව නබිතුමා ප්රකාශ කළා. නීතිය පහළ අයට එක විදියක් ඉහළ අයට තව විදියක් කියලා අපේ රටේ මතයක් තිබුණා. ඒත් නීතිය ඉදිරියේ හැමෝම සමාන බව අපි මේ රටට පසක් කරලා තිබෙනවා. නීතිය ඉදිරියේ හැමෝම සමානයි කියන සහතිකය අපි මේ රටට දීලා තිබෙනවා. මේ රට බිය ගන්වන රකුසෙක් ඉන්නවා. පොලිසිය, රාජ්ය සේවය වගේම පාසල් ළමයි ඒ රකුසා බිලිගන්නවා. ඒ වෙන කවුරුත් නෙවෙයි. මත්ද්රව්ය රකුසා. කිසිවෙක් ඉතුරු නොකර මේ රකුසා පැතිරෙනවා. එයින් උපයා ගන්නා අයුතු ධනය, පොලිසිය, ආර්.එම්.වී. එක, ඉමිග්රේෂන් එක වගේ වැදගත් ආයතන බිලිගන්නවා. මේ තත්ත්වය තව දශකයක් ක්රියාත්මක වුණොත් මුළු රාජ්ය යාන්ත්රණයම කඩා වැටෙනවා. අපි එය මුලිනුපුටා දමනවා. පාතාලය අවසන් කරන බවට මං ජනතාවට පොරොන්දු වෙනවා. මේ රටේ ජනතාවට අගතියක් වෙන තීරණයක් මං කවදාවත් ගන්නේ නෑ. ඒ වගේම ජනතාවටත් මං කියන්නේ මාව විශ්වාස කරන්න. තීන්දුව ගන්න කලින් මං හොඳට හිතනවා. ජනතාවගේ පැත්තෙන් හිතන්නේ. තීන්දුවක් ගැනීමේදී විය හැකි වාසි අවාසි, අනෙකුත් බාහිර සාධක, මේ සියල්ල තීන්දුව ගැනීමට පෙර සාකච්ඡාවට භාජනය කරනවා.
හැම පැත්තකින් හැම මානයකින් තීන්දුවක් ගැනීමට පෙර ඒ දෙස බලනවා. ඒත් තීන්දුව ගත් පසුව කිසිසේත් ආපසු හරවන්නේ නෑ. ඒ වගේම ගනු ලැබූ තීන්දුවල යම් අඩුවක් වෙනවා නම් ඒ වෙනස කරන්නත් අපි කිසිසේත්ම පැකිලෙන්නේ නෑ.
ඒ වගේම අපි උත්සාහ දරනවා තව වසරක් වගේ කෙටි කාලයක් ඇතුළත රාජ්යයත් එක්ක කරන සියලු වැදගත් ගනුදෙනු, සියලු වැදගත් ගනුදෙනු, ගෙදර ඉඳගෙන ඔන්ලයින් හරහා කරන්න පුළුවන් සිස්ටම් එකක් අපේ රටට ගේනවා. ඒ රාජ්ය සේවයේ කාර්යක්ෂමතාව වැදගත් කඩ ඉමක්.
රාජ්ය සේවය අපේ රටේ ආකර්ෂණය වෘත්තිය බවට පත් කළ යුතුව තිබෙනවා. ඒ සඳහා මේ වන විටත් 2025 හා 2026 වසර අපි වැටුප් වර්ධකයක් ලබා දී තිබෙනවා. ලබන වසරේ ජනවාරි මාසයේ අපි යළිත් වැටුප් වර්ධකයක් ලබා දෙන්න කටයුතු කරමින් තිබෙනවා. ඉතාමත් හොඳ සක්රිය රාජ්ය සේවාවක් ගොඩනැඟීම අපේ අරමුණයි.“
