විස්සයි20 ලෝක කුසලානයේ තරග පාවාදීමක්
ශ්රී ලංකාවේ හා ඉන්දියාවේ සත්කාරකත්වයෙන් පැවති විස්සයි20 ලෝක කුසලාන ක්රිකට් තරගාවලියේදී කැනඩාව හා නවසීලන්තය අතර පැවති තරගයේ පාවාදීමක් සිදු වූ බවට වාර්තා වෙනවා.
මේ තරග පාවාදීමේ වංචාවට කැනඩා රජය විසින් ත්රස්තවාදී සංවිධානයක් ලෙස තහනම් කොට ඇති ප්රචණ්ඩ අපරාධ සංවිධානයක් වූ ලෝරන්ස් බිෂ්නෝයි කල්ලිය හා කැනඩා ක්රිකට් නායක දිල්ප්රීත් බජ්වා සම්බන්ධ වී ඇති බවට කරුණු අනාවරණය වෙමින් පවතිනවා.
අයිසීසී දූෂණ විරෝධී ඒකකය මේ සම්බන්ධයෙන් විමර්ශනය කරමින් සිටින අතර, නායක දිල්ප්රීත් බජ්වා පරීක්ෂාවට ලක් කොට ඔහුගේ ජංගම දුරකතනය පවා භාරයට ගත් බව කැනඩා ක්රිකට් ආයතනය කරුණු හෙළි කළා.
මෑතකදී කැනඩාවේ විකාශය වූ දූෂණය, අපරාධ සහ ක්රිකට් යන මිනිත්තු 43ක වාර්තා චිත්රපටයකින් හෙළිකරන ලද තොරතුරු මත පදනම්ව අයිසීසී දූෂණ විරෝධී ඒකකය විමර්ශන ආරම්භ කළ අතර, කැනඩා ක්රිකට් ආයතනය ද වෙනම පරීක්ෂණයක් ආරම්භ කොට තිබෙනවා.
මේ වාර්තා චිත්රපටයෙන් හෙළි වන්නේ කැනඩා නායක දිල්ප්රීත් බජ්වා නවසීලන්තයට එරෙහි තරගයේදී වැඩි ලකුණු ප්රමාණයක් දුන් හා අසාමාන්ය ඕවරයක් යැවූ විට මුලින්ම සැකයට භාජනය වූ බවයි.
පසුගිය පෙබරවාරි 17දා චෙන්නායි එම්ඒ චිදම්බරම් ක්රිකට් ක්රීඩාංගණයේදී පැවති කැනඩාව සහ නවසීලන්තය අතර තරගයේ පළමුවෙන් පන්දුවට පහර දුන් කැනඩාව කඩුලු හතරක් දැවී ලකුණු 173ක් ලබාගත් අතර, නවසීලන්තය පහසුවෙන් ඕවර 15.1කින් ඉලක්කය හඹා ගොස් කඩුලු අටකින් ජයග්රහණය කර සුපිරි 8 වටයට සුදුසුකම් ලැබුවා.
නවසීලන්ත ඉනිමේ පස්වැනි ඕවරය කැනඩා නායක දිල්ප්රීත් බජ්වා යැවූ අතර, ඔහු එම ඕවරයේදී නෝ බෝලයක් සහ වයිඩ් එකක් සමඟ ලකුණු 15ක් ලබා දුන්නා. ඒ වන විට නවසීලන්තයේ ලකුණු සංඛ්යාව කඩුලු 2ක් දැවී ලකුණු 35ක් විය.
ලෝක කුසලාන තරගාවලියට සති තුනකට පෙර දිල්ප්රීත් බජ්වා නායකත්වයට පත්වීම සම්බන්ධයෙන් ද මතභේදයක් පවතිනවා.
වාර්තාවන අන්දමට, බජ්වා කණ්ඩායමේ නායකත්වයට පත්කිරීම සඳහා ලෝරන්ස් බිෂ්නෝයි කල්ලිය භූමිකාවක් ඉටුකොට තිබෙනවා.
පසුගිය වසරේ ජූලි මාසයේදී, බ්රිතාන්ය සරේහි අවන්හලක ක්රිකට් ක්රීඩකයන් 25ක් පමණ සිටි අවස්ථාවක බිෂ්නෝයි කල්ලියේ සාමාජිකයන් යැයි කියා ගන්නා දෙදෙනකු කැනඩා ක්රිකට් කණ්ඩායමේ ක්රීඩකයකුට තර්ජනය කළ සිද්ධියක්ද අනාවරණවය වී ඇත.
කැනඩා හිටපු පුහුණුකරුවකු වන ශ්රී ලංකා ක්රිකට් ක්රීඩක පුබුදු දසනායක ද කලකට පෙර කැනඩා ක්රිකට් වෙතට චෝදනා එල්ල කර තිබුණා. 2024 විස්සයි20 ලෝක කුසලානයට පෙර කණ්ඩායම තෝරා ගැනීම සම්බන්ධයෙන් තමාට බලපෑම් එල්ල වූ බව ඔහු පවසම්න්.
ඒ සමඟ වැරදි ලෙස සේවයෙන් පහ කිරීම සම්බන්ධයෙන් ඔහු දැනට කැනඩා ක්රිකට් ආයතනයට එරෙහිව නඩු පවරා ඇතැයි ද වාර්තා වෙනවා.
