මාලිමාව ආරාධනා කළොත් කොළඹ නගර සභාවට එජාප සහාය දෙනවා
කොළඹ නගර සභාවේ බලය පිහිටුවන්න මාලිමාව ආරාධනා කළොත් මාලිමාවට සහයෝගය ලබා දෙනවා යැයි ගම්පහ දිස්ත්‍රික් හිටපු පාර්ලිමේන්තු මන්ත්‍රී හා ගම්පහ එක්සත් ජාතික පක්ෂ ප්‍රධාන සංවිධායක අජිත් මාන්නප්පෙරුම මහතා පවසනවා.
හිටපු පාර්ලිමේන්තු මන්ත්‍රී අජිත් මාන්නප්පෙරුම මහතා මෙම අදහස් පළ කළේ ගම්පහ ආසනයේ එක්සත් ජාතික පක්ෂ ප්‍රධාන කාර්යාලයේ පැවති මාධ්‍ය හමුවකදීයි.
එහිදී ඒ මහතා මෙසේද පැවසීය.
කොළඹ නගර සභාව නන්නත්තාර වෙන්න දෙන්නෙ නැතිව බලය පිහිටුවන්න එක්සත් ජාතික පක්ෂයට මාලිමාව ආරාධනා කළොත් අපි මාලිමාවට සහයෝගය දෙනවා. එක්සත් ජාතික පක්ෂයට සමගි ජන බලවේගය ආරාධනා කළොත් සමගි ජන බලවේගයට සහයෝගය ලබා දෙනවා.
අපි බලන්නේ පක්ෂය මොකක්ද කියලා නෙමෙයි. කොළඹ නගර සභාව ස්ථාපිත කරන්නේ කොහොමද කියලා.
එක්සත් ජාතික පක්ෂයත් එහි නායකයා රනිල් වික්‍රමසිංහ මහතාත් හිතන විදිහ තමයි රට හා පළාත් පාලන ආයතන නන්නත්තාර වෙන්න නොදී හරි නායකත්වයක් හරිගස්සලා බලය පිහිටුවීමට සහයෝගය ලබා දීම. එදත් මේ රටට නායකත්වයක් අවශ්‍ය වෙච්ච වෙලාවේ රනිල් වික්‍රමසිංහ මහතා තමයි කොන්දේසි විරහිතව රට භාර ගෙන මේ රට බේරලා දුන්නෙ . ඉතින් ඒ වගේ තමයි කොළඹ මහ නගර සභාව විතරක් නෙමෙයි යම් පළාත් පාලන ආයතනයක් බලය පිහිටුවා ගන්න බැරිව නන්නත්තාර වෙනවානම් එක්සත් ජාතික පක්ෂය සූදානම් අවශ්‍ය සහයෝගය ලබා දෙන්න යයි ඒ මහතා වැඩිදුරටත් සඳහන් කළා.
