මැතිවරණ නොපවත්වන්න රජය තීරණය කර නෑ
නීතියට අනුකූලව පැවැත්විය යුතු හා පැවැත්විය හැකි මැතිවරණ සියල්ල පවත්වන බවත් කිසිදු මැතිවරණයක් නොපවත්වන්න රජය තීරණය කර නොමැති බවත් අගමැතිනි හරිනි අමරසූරිය මෙණෙවිය පාර්ලිමේන්තුවේදී ඊයේ (10) ප්රකාශ කළා.
ගතවූ වසර එකහමාර තුළ වත්මන් ආණ්ඩුව මැතිවරණ දෙකක් පවත්වා ඇති බවත් වත්මන් ආණ්ඩුව මැතිවරණවලට බිය නොමැති බවත් අගමැතිවරිය ප්රකාශ කළා.
මැතිවරණ ක්රියාවලිය සම්බන්ධයෙන් සොයා බැලීම සඳහා පත්කර ඇති පාර්ලිමේන්තු කාරක සභා නිර්දේශය අනුව සහ අනෙකුත් කාරණා සම්බන්ධයෙන් අවධානය යොමුකර මැතිවරණ පවත්වන බවද අගමැතිවරිය සඳහන් කළා.
අගමැතිවරිය මේ බව සඳහන් කළේ පාර්ලිමේන්තු මන්ත්රී රවී කරුණානායක මහතා මතු කරන ලද ප්රශ්නයකට පිළිතුරු දෙමින්.
වැඩිදුරටත් අදහස් දැක්වූ අගමැතිවරිය මෙසේද පැවසූවා,
එක් එක් පළාත් සභාවල කාල වකවානු විවිධ දිනවලදී අවසන් වී තිබෙනවා. පළාත් සභා ඡන්ද විමසීම් පැවැත්වීම සඳහා බලාත්මක වූ නීතියක් නොමැති වීම තුළ මැතිවරණ කොමිෂන් සභාව විසින් මැතිවරණ පැවැත්වීම සම්බන්ධයෙන් නිවේදන නිකුත් කර නැහැ.
මේ දක්වා මැතිවරණ සීමා නීර්ණ කොට්ඨාස සම්බන්ධයෙන් අවසන් ක්රියාවලියකට පැමිණ නොමැති නිසා පළාත් සභා මැතිවරණය පැවැත්වීමේ හැකියාවක් නැහැ. මේ සම්බන්ධයෙන් කටයුතු කිරීම සඳහා සභාපතිවරයා ලෙස අමාත්ය විජිත හේරත් මහතාගේ සභාපතිත්වයෙන් කමිටුවක් පත් කර තිබෙනවා. ඉහත කමිටුව විසින් පාර්ලිමේන්තුව වෙත ලබාදෙන වාර්තාව අනුව ඉදිරි කටයුතු සිදු වනු ඇත.
රනිල් වික්රමසිංහ මහතා ප්රජාතන්ත්රවාදීද, නැද්ද සහ ඔහුගේ ක්රමවේද සම්බන්ධයෙන් රවී කරුණානායක මහතාටම නිගමනයකට එන්න පුළුවන්. මෙහිදී ඒ සම්බන්ධයෙන් මගේ නිගමනය වැදගත් නැහැ.
ඒ වගේම නීතියට අනුව පැවැත්විය යුතු සහ පැවැත්විය හැකි මැතිවරණ සියල්ල පවත්වනවා. ඒ වගේම කිසිම මැතිවරණයක් නොපවත්වන බවට රජය තීරණයක් ගෙන නැහැ.
ඡන්ද කල්දැමූ පක්ෂයක සාමාජිකයෙක් මේ ප්රශ්නය මගෙන් අහන එක සුදුසු නැහැ. ගතවූ අවුරුදු එකහමාර තුළ අපි මැතිවරණ දෙකක් පවත්වා තිබෙනවා.
