දැරියක් මරා සැගවූ ඕස්ට්රේලියානුවා ගුවන් තොටුපළේදී මාට්ටු
තායිලන්තයේ සුප්රසිද්ධ පතායා නගරයේදී 17 හැවිරිදි ටුන්චනොක් ඩොන්හොම්ලා නම් බාලවයස්කාර දැරියක ඝාතනය කර, ඇයගේ සිරුර ගමන් මල්ලක බහා සඟවා තැබීමේ අමානුෂික සිදුවීමක් සම්බන්ධයෙන් 46 හැවිරිදි ඕස්ට්රේලියානු ජාතිකයෙකු පතායා පොලිසිය විසින් අත්අඩංගුවට ගෙන තිබෙනවා.
සැකකරු තායිලන්තයෙන් පලා යාමට උත්සාහ කිරීමේදී බැංකොක්හි සුවර්ණභූමි ජාත්යන්තර ගුවන් තොටුපළේදී පොලිස් දැලට හසුව ඇති අතර, ඔහුගෙන් කළ ප්රශ්න කිරීම්වලින් පසු දුම්රිය මාර්ගයක් අසල දමා තිබූ වින්දිත දැරියගේ නිරුවත් මළ සිරුර සොයා ගැනීමට බලධාරීන්ට හැකි වී තිබෙනවා.
පොලිස් විමර්ශනවලදී අනාවරණය වී ඇත්තේ මුදල් සම්බන්ධයෙන් ඇති වූ මතභේදයක් මෙම ඝාතනයට මුල් වී ඇති බවයි.
සිද්ධිය වූ බ්රහස්පතින්දා අලුයම කාලයේ සැකකරු සහ දැරිය ගොඩනැගිල්ලක ලොබියක අත් අල්ලාගෙන සිටින අයුරු සී.සී.ටී.වී (CCTV) දර්ශන මගින් තහවුරු වී තිබෙනවා.
කෙසේ වෙතත්, සැකකරු තමාට එල්ල වන සියලු චෝදනා ප්රතික්ෂේප කරමින් ප්රකාශ කර ඇත්තේ මෙය තමාගේ පාලනයෙන් තොරව සිදු වූවක් බවයි.
සැකකරුට එරෙහිව ඝාතනය කිරීම, මළ සිරුරක් සඟවා තැබීම සහ බාලවයස්කාර දැරියක් පැහැරගෙන යාම යන බරපතළ චෝදනා තුනක් යටතේ දැනටමත් නඩු පවරා ඇත.
තායිලන්ත නීතියට අනුව වරදකරු වුවහොත් ඔහුට මරණ දඬුවම හෝ වසර 20ක සිරදඬුවමක් හිමිවීමට නියමිතයි.
මෙම ඛේදවාචකය හේතුවෙන් තායිලන්තයේ සංචාරක ක්ෂේත්රයේ ආරක්ෂාව පිළිබඳව දැඩි සමාජ කතාබහක් සහ ජාත්යන්තර අවධානයක් යොමුව ඇති අතර විදේශිකයන් සම්බන්ධ අපරාධ වැළැක්වීමට බලධාරීන් දැඩි පියවර ගනිමින් සිට්නවා.
PHOTOS
