ශ්‍රී ලංකා එංගලන්ත එක්දින තරගාවලිය අද ඇරඹේ
සංචාරක ශ්‍රී ලංකා ක්‍රිකට් කණ්ඩායම සහ එංගලන්ත කණ්ඩායම අතර තරග 3කින් සමන්විත එක්දින ක්‍රිකට් තරගාවලිය අද (22) චෙස්ටර් ලී ස්ට්‍රීට්හිදී ආරම්භ වීමට නියමතයි.
දිවා රාත්‍රී තරගයක් වන මේ තරගය ශ්‍රී ලංකා වේලාවෙන් පස්වරු 5.00ට ආරම්භ වන අතර, එය එංගලන්ත වේලාව අනුව දහවල් 12.30 වනවා.
මින් පෙර දෙපිල අතර පැවති තරග 3කින් සමන්විත විස්සයි20 තරගාවලිය 3-0ක් ලෙස පූර්ණ පරාජයකින් පසුව ශ්‍රී ලංකා පිල අද (22) පිටියට පිවිසීමට සිදුව ඇත්තේ එක්දින පිටියේදී හෝ අහිමි වූ ගෞරවය රැක ගැනීම සඳහායි.
සීමිත ඕවර කණ්ඩායම්වල නිත්‍ය නායක කුසල් මෙන්ඩිස් මේ තරගයෙන් යළි කණ්ඩායමට එක්වන අතර, විස්සයි20 සංචිතයේ නොසිටි පවන් රත්නායක, අසිත ප්‍රනාන්දු සහ ඩිල්ෂාන් මදුශංක සමග තවමත් ජාත්‍යන්තර වරම් දිනා නැති සචිඳු කොළඹගේ මේ සංචිතයට එක්ව සිටිනවා.
ශ්‍රී ලංකා එක්දින පිල එංගලන්ත භූමියේදී සාර්ථකත්වයක් පෙන්වා ඇති අතර, මෙතෙක් එරටදී පැවති තරග 25කින් තරග 12ක් ජය ගැනීමට ශ්‍රී ලංකා පිල සමත්ව තිබෙනවා.
එංගලන්තය තරග 13ක් ජයගෙන ඇති අතර, අවසන් වරට එක්දින තරගාවලි ජයක් ශ්‍රී ලංකා පිල සතුවී ඇත්තේ 2014 වසරේදීයි.
තරග 5කින් සමන්විත එම තරගාවලිය ශ්‍රී ලංකා පිල ජය ගෙන ඇත්තේ 3-2ක් ලෙසින්.
ජගත් එක්දින පිටියේදී 82 වරක් හමුව ඇති මේ දෙපිල අතරින් තරග 40ක් එංගලන්තයත්, තරග 38ක් ශ්‍රී ලංකාවත් ජයගෙන තිබෙනවා.
හැරී බෲක්ගේ නායකත්වයෙන් තරගාවලියට එක්වන එංගලන්ත පිලට සුපිරි පිතිකරු ජෝ රූට් එක්වන අතර, හෙන්රි ක්‍රොකොම්බි නවකයකු ලෙස සංචිතයට එක්ව සිටිනවා.
එක්දින ජාත්‍යන්තර තරග කාලසටහන
1 වැනි එක්දින ජාත්‍යන්තර තරගය
: සැප්තැම්බර් 22 වැනිදා (දිවා/රාත්‍රී), Chester-le-Street හී Riverside ක්‍රීඩාංගණයේ දී.
2 වැනි එක්දින ජාත්‍යන්තර තරගය
: සැප්තැම්බර් 24 වැනිදා (දිවා/රාත්‍රී) Leeds හී Headingley ක්‍රීඩාංගණයේ දී.
3 වැනි එක්දින ජාත්‍යන්තර තරගය
: සැප්තැම්බර් 27 වැනිදා London හී Kennington Oval ක්‍රීඩාංගණයේ දී.
