ඉරාන යෝජනාවක් ට්‍රම්ප් ප්‍රතික්ෂේප කරයි
හෝමූස් සමුද්‍ර සන්ධිය දින 7ක් ඇතුළත විවෘත කිරීම සඳහා ඉරානය ඉදිරිපත් කළ යෝජනාවලිය අමෙරිකානු ජනාධිපති ඩොනල්ඩ් ට්‍රම්ප් ප්‍රතික්ෂේප කර තිබෙනවා.
පසුගිය ජූනි මාසයේදී දෙපාර්ශ්වය අතර අත්සන් තැබූ අවබෝධතා ගිවිසුමේ කොන්දේසි ඇතුළත් කරමින් එම යෝජනාවලිය කටාර් රාජ්‍යයේ නියෝජිතයන් මඟින් අමෙරිකාවට ඉදිරිපත් කළ බව ඉරාන විදේශ ඇමැති අබ්බාස් අරග්චි ප්‍රකාශ කර ඇති අතර, ඩොනල්ඩ් ට්‍රම්ප් සඳහන් කර ඇත්තේ එම යෝජනාවලිය පිළිගත නොහැකි බවයි.
ඉරානය සමඟ ගිවිසුම්ගත වීමට එකඟ වුවද, එම යෝජනාවලිය පිළිගත නොහැකි බව ඔහු සඳහන් කර ඇත්තේ වැඩිදුර පැහැදිලි කිරීමකින් තොරව බව ද වාර්තා වෙනවා.
දෙරට අතර යුද ගැටුම් තාවකාලිකව අවසන් කරමින් සටන් විරාමයකට එක්වීමත්, ඉරානයට පනවා ඇති නාවික අවහිරතා ඉවත් කිරීමත් ඇතුළු කරුණු ගණනාවක් නව යෝජනාවලියට ඇතුළත් කර තිබූ බවත්, ඩොනල්ඩ් ට්‍රම්ප් විසින් ප්‍රතික්ෂේප කළ යෝජනාවලිය සම්බන්ධව අමෙරිකානු පාර්ශ්වයේ නිල පිළිතුරක් ලැබෙනතුරු බලා සිටින බවද අබ්බාස් අරග්චි සඳහන් කර තිබෙනවා.
මේ අර්බුදය විසඳා ගැනීමට සියලු පාර්ශ්වයන් විවෘත සංවාදයක නිරත විය යුතු බවට අමෙරිකාව සහ ඉරානය අතර මැදිහත්කරුවකු ලෙස කටයුතු කරන ඕමානය ඉල්ලීමක් කර ඇතැයි ද විදෙස් මාධ්‍ය වාර්තා කරයි. එක්සත් ජාතීන්ගේ මහා මණ්ඩල සැසියේ සාකච්ඡාවේදී ඕමාන විදේශ ඇමැති සයිඩ් බද්ර් බින් හමාඩ් බින් හමූඩ් අල්බුසායිඩි ප්‍රකාශ කර ඇත්තේ මේ උපාය මාර්ගික නාවික මාර්ගයේ ආරක්ෂාව තහවුරු කිරිමේ උත්සාහයන් සඳහා සියලු පාර්ශ්ව සහයෝගයෙන් කටයුතු කළ යුතු බවයි.
