ශ්රී ලංකා පිල නේපාලයට පරදී
මධ්යම ආසියානු අවුරුදු 19න් පහළ කාන්තා වොලිබෝල් ශූරතාවලියේ ඊයේ පැවති තරගයේදී නේපාලය හමුවේ වට 3-1කින් පරාජය වීමට ශ්රී ලංකා යොවුන් ක්රීඩිකාවන්ට සිදුවිය.
කොළඹ සුගතදාස ගෘහස්ථ ක්රීඩාංගණයේ පැවති තරගයේ පළමු වටය ලකුණු 25-18ක් ලෙස ජය ගැනීමට නේපාල පිල සමත් වූ අතර, දෙවැනි වටයේදී කරට කර සටනක් ගියද ශ්රී ලංකා ක්රීඩිකාවන්ගේ අතපසුවීම් හේතුවෙන් එම වටයේ ජය 26-24ක් ලෙස නේපාල ක්රීඩිකාවන් සතුවිණි. ඔවුන් වට දෙකක් ඉදිරියෙන් සිටියදී තෙවැනි වටය සිය අණසකට නතුකරගත් ශ්රී ලංකා ක්රීඩිකවෝ 25-19ක් ලෙස ජය ගනිමින් තරගය 2-1ක් ලෙස කර ජය ගත්තා.
කෙසේ වෙතත් නේපාලයට ජයග්රහණය සඳහා තවත් එක් වටයක ජයක් පමණක් අවශ්යව තිබියදී තීරණාත්මක සිවුවැනි වටය ලකුණු 25-20ක් ලෙස ජය ගනිමින් මේ තරගාවලියේ සිය පළමු ජය වාර්තා කිරීමට නේපාල ක්රීඩිකාවෝ සමත් ව්ය.
මේ ජය සමඟ නේපාලය ප්රසාද ලකුණු සටහනේ දෙවැනි තැනට පත්වූ අතර, පෙරේදා මාලදිවයින පරාජය කිරීම හේතුවෙන් ශ්රී ලංකාවට තෙවැනි තැන හිමි විය.
ඊයේ පස්වරුවේ පැවති අනෙක් තරගයේදී මාලදිවයිනට එරෙහිව වට 3-0ක (25-21, 25-9, 25-21) පහසු ජයක් අත්කර ගැනීමට කිරිගිස්තානයට සමත් විය. එය කිරිගිස්තානය අඛණ්ඩව ලැබූ දෙවැනි ජය විය.
මධ්යම ආසියානු වොලිබෝල් සංගමයේ ආරාධනාවකට අනුව ශ්රී ලංකා වොලිබෝල් සම්මේලනය සංවිධාන කරන මේ ශූරතාවලියේ තෙවැනි දිනය වන අද මූලික වටය නිමා කරමින් මාලදිවයින නේපාලය සමඟ පස්වරු 2.00ටත්, කිරිගිස්තානයට එරෙහිව ශ්රී ලංකාව පස්වරු 4.30ටත් තරග වැදීමට නියමිතයි.
