වැඩසිටිකන්දේ ආරක්ෂාව ඉවත්කර නෑ
කතරගම වැඩසිටිකන්ද පුද බිමේ ආරක්ෂාව සඳහා පොලිස් හා යුද හමුදා නිලධාරීන් යොදවා ප්‍රමාණවත් ආරක්ෂාවක් දී ඇතැයි පොලිස් මාධ්‍ය ප්‍රකාශක සහකාර පොලිස් අධිකාරී නීතිවේදී උදය කුමාර වුට්ලර් මහතා සඳහන් කරනවා.
එහි ආරක්ෂාව ඉවත්කර ඇති බවට සඳහන් තොරතුරුවල සත්‍යතාවක් නොමැති බවත් වුට්ලර් මහතා පවසන්නේ.
ඒ සම්බන්ධයෙන් කතරගම පොලිස් ස්ථානාධිපතිවරයා විසින් තමා වෙත වාර්තාවක්ද ඉදිරිපත්කර ඇති බව වුට්ලර් මහතා සඳහන් කළා.
කතරගම ඓතිහාසික වැඩසිටිකන්ද පුදබිමේ විහාරාධිපති හිමියන් විසින් එම පුදබිමේ ආරක්ෂාව සඳහා ස්ථාපිතකර තිබූ පොලිස් මුරපොළෙහි රාජකාරි කළ නිලධාරීන් ඉවත්කර ඇති බවට සඳහන් කර ජනාධිපතිතුමා වෙත ලිපියක් යොමු කර ඇති බවත් එම ලිපිය සමාජ මාධ්‍ය ජාලවල මේ දිනවල සංසරණය වෙමින් පවතින බවත් වුට්ලර් මහතා පැවසුවා.
මේ සම්බන්ධයෙන් තමා කතරගම පොලිස් ස්ථානාධිපතිවරයාගෙන් වාර්තාවක් කැඳවූ බවත් එහි සත්‍යතාවක් නොමැති බවත් පොලිස් ස්ථානාධිපතිවරයා තහවුරුකර තිබෙන බවත් වුට්ලර් මහතා තහවුරු කළා.
වැඩසිටිකන්ද පුදබිමෙහි ආරක්ෂාව සඳහා ප්‍රමාණවත් පොලිස් හා යුද හමුදා නිලධාරීන් පිරිසක් යොදවා ආරක්ෂාව තහවුරුකර ඇති බව ද වුට්ලර් මහතා පවසනවා.
පුද්ගලානුබද්ධ ආරක්ෂාව නොව, ස්ථානයේ බැතිමතුන්ගේ ආරක්ෂාව තහවුරු කිරීමට පියවර ගෙන ඇති බව ද වුට්ලර් මහතා අවධාරණය කරයි.
වැඩසිටිකන්ද පොලිස් මුරපොළට අනුයුක්තව සිටි අතිරික්ක නිලධාරීන් ඉවත්කර එම නිලධාරීන් කතරගම පොලිස් වසමේ නීතිය හා සාමය ස්ථාපිත කිරීමේ රාජකාරි සඳහා යොදවා ඇති බව ද වුට්ලර් මහතා සඳහන් කරයි.
එසේ නොමැතිව ජනාධිපතිවරයා වෙත යොමුකර ඇති ලිපියෙහි සඳහන් ලෙස වැඩසිටි කන්ද පුදබිමේ පොලිස් ආරක්ෂාව පූර්ණ වශයෙන් ඉවත්කර නොමැති බව ද වුට්ලර් මහතා සඳහන් කරනවා.
