යොවුන් කාන්තා ක්රිකට් කණ්ඩායම ඔස්ට්රේලියාවේදී අපරාජිතයි
ඔස්ට්රේලියාවේ පැවති යොවුන් කාන්තා කණ්ඩායම් අතර විස්සයි20 තුන්කොන් ක්රිකට් තරගාවලියේදී ශ්රී ලංකා ක්රීඩිකාවෝ අපරාජිතව තරගාවලිය නිමා කළා.
පෙරේදා පැවැති ඔස්ට්රේලියාව සමඟ දෙවැනි තරගයෙන් ලකුණු 3ක තියුණු ජයක් වාර්තා කළ ශ්රී ලංකා පිල එංගලන්ත සහ ඔස්ට්රේලියා කණ්ඩායම්වල සහභාගිත්වයෙන් පැවැති තුන්කොන් ක්රිකට් තරගාවලියේ එකම අපරාජිත කණ්ඩායම බවට පත්වීමට සමත් වූවා.
ගෝල්ඩ් කෝස්ට් නුවර බිල් පිපේන් ඕවල් පිටියේ පැවැති තරගයේ ජයත් සමඟ ඉතිහාසයේ ශ්රී ලංකා යොවුන් කාන්තා කණ්ඩායමක් ඔස්ට්රේලියානු යොවුන් කාන්තා පිලට එරෙහිව වාර්තා කරන ලද 8 වැනි විස්සයි20 තරග ජයග්රහණය වාර්තා විය.
ශ්රී ලංකා ක්රිකට් ආයතනය විසින් ක්රියාත්මක කරනු ලබන ජාතික ක්රිකට් සංවර්ධන ගමන් මඟ ‘ක්රිකට් ගමට’ වැඩසටහන යටතේ කොළඹින් පිට පළාත් ක්රීඩිකාවෝ 12ක් මෙම තරගාවලියේදී ශ්රී ලංකා පිල නියෝජනය කළා.
ශ්රී ලංකා කාන්තා යොවුන් කණ්ඩායම සියලු දෙනා දැවී ලකුණු 99 (19.4)
ලිමන්සා තිලකරත්න 35, ප්රමුදි මෙත්සරා 21 (ඉරා ආරේ 19/3, අමුරෝරා මාවර්ස් 15/2, මියා බාර්වික් 20/2)
ඔස්ට්රේලියානු කාන්තා යොවුන් කණ්ඩායම සියලු දෙනා දැවී ලකුණු 96 (19.5)
ඇලිසා ඩර්මොඩි 25, ශිලියා ජුලියන් 17, එමලි පවෙල් 15, චාර්ලි මක්ලෙනන් 17, (චමුදි ප්රබෝධා 22/3, අසේනි තලගුණේ 28/2, ශෂිනි ගිම්හානි 13/2, ලිමන්සා තිලකරත්න 17/2)
