අමෙරිකානු ක්රීඩක අකිලේෂ්ට ලැබුණු වසර 8ක ක්රිකට් තහනම
අමෙරිකානු ජාතික ක්රිකට් කණ්ඩායමේ දඟ පන්දු යවන ක්රීඩක අකිලේෂ් රෙඩ්ඩිට සියලුම ආකාරයේ ක්රිකට් සඳහා වසර 8ක තහනමක් පැනවීමට ජාත්යන්තර ක්රිකට් කවුන්සිලය කටයුතු කර තිබෙනවා.
අබුඩාබි ටී10 තරගාවලිය අතරතුර අයිසීසී දූෂණ විරෝධි නීති සංග්රහයෙන් වගන්ති තුනක් උල්ලංඝනය කිරීමේ චෝදනාවට වරදකරු වීම හේතුවෙන් අකිලේෂ්ට මේ තහනම පනවා ඇත. මේ අනුව ඔහුට ඉදිරි වසර 8ක කාලය තුළ කිසිදු ආකාරයක ක්රිකට් තරගයකට හෝ පුහුණු සැසියකට සහභාගි වීමේ අවස්ථාව අහිමි වනු ඇත.
2025-26 අබුඩාබි ටී10 තරගාවලිය අතර ඇස්පින් ස්ටැලියන්ස් පිල වෙනුවෙන් තරග දෙකක් ක්රීඩා කළ අකිලේෂ්ට චෝදනා එල්ල කරමින් පසුගිය නොවැම්බර් මස සිට තාවකාලික ක්රීඩා කටයුතු අත්හිටුවා පරීක්ෂණ සිදු කළා.
තරග පාවාදීම්, ගිවිසුමකට පාර්ශ්වකරුවකු වීම හෝ ඒ හා සමාන දූෂිත ක්රියාවන්හි නිරත වීමට උත්සාහ කිරීම හෝ ඊට අනුබල දීම, පෙලඹවීම, පරීක්ෂණයට අදාළ දත්ත සහ පණිවිඩ මකා දැමීම වැනි බරපතළ චෝදනා ඔහුට එල්ල වී තිබිණි. චෝදනා තහවුරුවීම හේතුවෙන් පැනවූ මේ තහනම පසුගිය වසරේ නොවැම්බර් 21 වැනිදා සිට ක්රියාත්මක වේ.
