නායක කුසල් මෙන්ඩිස් ශ්‍රි ලංකා පිල ජයග්‍රහණය කරා ගෙනයයි

පාකිස්තානයේ රාවල්පින්ඩිහිදී පැවැති තෙවන විස්සයි20 තරගයෙන් සත්කාරක පාකිස්තාන කණ්ඩායම කඩුලු 8කින් පරාජය කළ ශ්‍රී ලංකාව විශිෂ්ට ජයක් වාර්තා කර තිබෙනවා.

පාකිස්තානය ලබාදුන් ලකුණු 169ක ඉලක්කය හඹා ගිය ශ්‍රී ලංකා පිතිකරුවන් පන්දුවාර 17යි පන්දු 1ක් අවසානයේ කඩුලු 2ක් පමණක් දැවී ලකුණු 172ක් රැස් කරමින් ජයග්‍රහණය තහවුරු කරගත්තා.

ශ්‍රී ලංකා ජයග්‍රහණයේ ප්‍රධානතම සාධකය වූ නායක කුසල් මෙන්ඩිස් පන්දු 48කින් නොදැවී ලකුණු 87ක් රැස් කළේ හතරේ පහර 9ක් සහ හයේ පහර 4ක් ද රැස් කරමින් බවයි සඳහන්.

ඔහුගේ විශිෂ්ට ඉනිමට ශක්තිමත් සහයක් ලබාදුන් කමිඳු මෙන්ඩිස් පන්දු 27කින් නොදැවී ලකුණු 40ක් ලබාගත් අතර, සිනෙත් ජයවර්ධන පන්දු 26කදී ලකුණු 38ක් රැස් කළා.

තරගයේ පළමුව පන්දුවට පහරදුන් පාකිස්තානයට නියමිත පන්දුවාර 20 අවසානයේ කඩුලු 8ක් දැවී ලබාගත හැකි වූයේ ලකුණු 168ක් පමණක් බවයි සඳහන්.

පාකිස්තාන නායක සහිබ්සාදා ෆර්හාන් පන්දු 47කින් ලකුණු 76ක් රැස් කරමින් සිය කණ්ඩායමට ශක්තියක් වූ අතර, ඔහුගේ ඉනිමට හතරේ පහර 7ක් සහ හයේ පහර 3ක් ඇතුළත් වුණා.

අරාෆත් මින්හාස් නොදැවී ලකුණු 34ක් ලබාගත්තා.

ශ්‍රී ලංකා පන්දු යවන්නන් අතරින් දසුන් ශානක ලකුණු 21කට කඩුලු 3ක් දවාගනිමින් දස්කම් දැක්වූ අතර, නුවන් තුෂාර සහ එෂාන් මාලිංග කඩුලු 2 බැගින් බිඳහෙළා තිබෙනවා.

ඒ අනුව, පිතිකරණයෙන් සහ පන්දු යැවීමෙන් දස්කම් දැක්වූ ශ්‍රී ලංකා කණ්ඩායම රාවල්පින්ඩිහිදී පාකිස්තානයට එරෙහිව කැපී පෙනෙන ජයක් හිමිකර ගත්තා.