ශ්රී ලංකා යොවුන් කාන්තා පිලට තියුණු පරාජයක්
අසේනි තලගුණේ සහ නෙත්මි උපේක්ෂාගේ සටන්කාමී පන්දු යැවීම අපතේ යවමින් ඔස්ට්රේලියානු අවුරුදු 19න් පහළ ක්රිකට් කණ්ඩායම සමඟ ඊයේ පැවති එක්දින තරගයෙන් ශ්රී ලංකා යොවුන් කාන්තා පිලට කඩුල්ලක තියුණු පරාජයක් අත්විය.
බ්රිස්බේන්හි ඉයන් හීලි ඕවල් පිටියේ ඊයේ පැවති මේ තරගයේ පළමුව පන්දුවට පහර දුන් ශ්රී ලංකා පිල ඕවර 49.3කදී ලකුණු 174කට දැවී ගිය අතර, එම ඉලක්කය හඹා ගිය ඔස්ට්රේලියානු පිල කඩුලු 9ක් දැවී ඉලක්කය සපුරා ගත්තේ ඕවර 43.1කදීයි.
ඔස්ට්රේලියානු මුල් කඩුලු 3 ලකුණු 54ක් තුළ බිඳවැටුණ ද අංක 4 පිතිකාරිනිය වූ ඉන්දිරා පැනෙලි ලකුණු 59ක් රැස් කරමින් ඉනිම ලකුණු 161ක් දක්වා ඉදිරියට ගෙන ගියාය. කෙසේ වෙතත් ඇයත් සමඟ කඩුලු 4ක් ලකුණු 4ක් තුළ බිඳදමමින් අසේනි සහ නෙත්මි තරගය යළිත් ශ්රී ලංකා පිල දෙසට හරවා ගත්තා.
එහෙත් නොදැවුණු ඉනිමක් ක්රීඩා කළ ඇලිසා ඩර්මෝඩි ලකුණු 37ක් රැස් කරමින් ඔස්ට්රේලියානු ජය තහවුරු කිරීමට සමත් වූවා.
දක්ෂ පන්දු යැවීමක නිරත වූ අසේනි තලගුණේ ලකුණු 42කට කඩුලු 5ක් බිඳදැමූ අතර, නෙත්මි උපේක්ෂා ලකුණු 5කට කඩුලු 2ක් දවා ගත්තා.
පළමුව පන්දුවට පහර දුන් ශ්රී ලංකා ඉනිමේදී විමෝක්ෂා බාලසූරිය ලකුණු 25ක් රැස් කරමින් ඉනිමේ වැඩිම ලකුණුලාභිනිය වූ අතර, උමයංගනා පීරිස් සහ චමෝදි හේරත් ලකුණු 20ක් බැගින් ඉනිම එක් කළා.
කෙසේ වෙතත් ඔස්ට්රේලියානු පන්දු යවන්නියන් ලබා දුන් අතිරේක ලකුණු 35 හේතුවෙන් ශ්රී ලංකා පිලට ලකුණු 174 සීමාවට පිවිසීමට හැකි විය.
පන්දු යැවීමේදී මියා බාර්වික් කඩුලු 3ක් සහ ඉරා අයෙරි කඩුලු 2ක් දවා ගත්තා.
මේ තරගයත් සමඟ තුන්කොන් එක්දින තරගාවලිය නිමා වූ අතර, ක්රීඩා කළ තරග දෙකම ජය ගනිමින් ඔස්ට්රේලියාව ප්රසාද ලකුණු සටහනේ පෙරමුණට පත් විය.
එංගලන්තය පමණක් පරාජය කළ ශ්රී ලංකා පිලට දෙවැනි තැන හිමි විය.
මේ කණ්ඩායම් 3 අතර විස්සයි20 තරගාවලිය අනිද්දා (11) ආරම්භ වන අතර, ශ්රී ලංකා පිල 12 වැනිදා එංගලන්තයට එරෙහිව පළමු තරගයට එක් වීමට නියමිතයි.
ශ්රී ලංකා යොවුන් කාන්තා පිල – 174 (ඕවර 49.3) විමෝක්ෂා බාලසූරිය 25, උමයංගනා පීරිස් 20, චමෝදි හේරත් නොදැවී 20, ශෂිනි ගිම්හානි 19, සංජනා කාවින්දි 19, යෂාලි ජිතාරා 16 (මියා බාර්වික් 22/3, ඉරා අයෙරි 29/2, එමිලි පවෙල් 4/1, ෆිලිප්පා සූසී 23/1, අයකා කැටෝ-ස්ටැෆර්ඩ් 26/1, ආවා ඩ්රරි 28/1)
ඔස්ට්රේලියා යොවුන් කාන්තා පිල – 175/9 (ඕවර 43.1) ඉන්දිරා පැනෙලි 59, ඇලිසා ඩර්මෝඩි නොදැවී 37, අයිලා ජොන්සන් 20, ෂිලෝ ජූලියන් 18(අසේනි තලගුණේ 42/5, නෙත්මි උපේක්ෂා 5/3, චමුදි ප්රබෝධා 33/1)
