සටන් විරාමය මැද ඊශ්රායලයෙන් ලෙබනනයට යළි ප්රහාර
අමෙරිකානු ජනාධිපති ඩොනල්ඩ් ට්රම්ප්ගේ මැදිහත්වීමෙන් ප්රකාශයට පත් කළ සටන් විරාමය අතරතුර ඊශ්රායල හමුදාව දකුණු ලෙබනනයට දැවැන්ත ප්රහාරයක් එල්ල කර ඇතැයි විදෙස් මාධ්ය වාර්තා කරනවා.
එහෙත් සටන් විරාමයට ඇතුළත් වූ බීරුට් අගනුවරට පහර නොදුන් බව ද වාර්තා වේ. උතුරු ඊශ්රායලය ඉලක්ක කරමින් හෙස්බුල්ලා සංවිධානය රොකට් ප්රහාරයක් එල්ල කළ බවත්, එම ප්රහාරය සාර්ථකව මැඬ පැවැත්වීමෙන් පසු දකුණු ලෙබනනයේ හෙස්බුල්ලා ඉලක්ක වෙත ගුවන් ප්රහාරයක් එල්ල කළ බවත් ඊශ්රායල හමුදාව නිවේදනය කර තිබේ.
ප්රහාරයෙන් දකුණු ලෙබනනයේ සිවිල් වැසියන් සිවුදෙනකු ජීවිතක්ෂයට පත්වී ඇතැයි ද, තවත් 127 දෙනකු තුවාල ලබා ඇතැයි ද ලෙබනනයේ සෞඛ්ය අමාත්යාංශය නිවේදනය කර තිබේ. එම ප්රහාර අතරතුර ජබෙල් අමිල් රෝහලේ ගොඩනැඟිල්ලකටත් අලාභ හානි සිදුවී ඇති අතර, තුවාල ලැබූ අය අතර රෝහල් කාර්ය මණ්ඩලයේ 33 දෙනකු සිටින බව ලෙබනනයේ සෞඛ්ය අමාත්යාංශය වැඩිදුරටත් සඳහන් කර තිබේ.
ලෙබනනයේ සටන් විරාමය ප්රකාශයට පත් කිරීමට පෙර අමෙරිකානු ජනාධිපතිවරයා ඊශ්රායල අගමැති බෙන්ජමින් නෙතන්යාහු සමඟ දුරකතනය ඔස්සේ සාකච්ඡා පවත්වා ඇති අතර, සටන් විරාමය උල්ලංඝනය කරමින් හෙස්බුල්ලා සංවිධානයෙන් ප්රහාරයක් එල්ල වුවහොත් ප්රතිප්රහාර එල්ල කරන බව එහිදී ඊශ්රායල අගමැතිවරයා ප්රකාශ කළ බව වාර්තා වේ.
