වී මිල නියම කළේ විද්‍යානුකූලවයි
ගොවියා,පාරිභෝගිකයා මෙන්ම වෙළෙන්ඳා යන පාර්ශ්ව ත්‍රිත්වය පිළිබඳ අවධානය යොමු කර, වී මිල නියම කිරීම විද්‍යානුකූලව සිදු කළ බව කෘෂිකර්ම සහ පශු සම්පත් නියෝජ්‍ය ඇමැති නාමල් කරුණාරත්න මහතා පවසනවා.
රජය සාධාරණ මිලකට වී මිලදී ගැනීමට සූදානම් බැවින් අඩු මිලට වී තොග කිසිවකුට ලබා නොදෙන ලෙසත් මේ වනවිට ගොයම් කපන ප්‍රදේශවල ගබඩා විවෘත කර තිබෙන බවත් නියෝජ්‍ය ඇමැතිවරයා අවධාරණය කළා.
බත්තරමුල්ල කෘෂිකර්ම අමාත්‍යාංශයේදී මාධ්‍ය වෙත අදහස් දක්වමින් නියෝජ්‍ය ඇමැතිවරයා මේ බැව් ප්‍රකාශ කළා.
එහිදී ඇමැතිවරයා මෙසේ ද පැවසූවා.
“මේ වෙනවිට වී මිලදී ගැනීම ආරම්භ කර තිබෙනවා. විවිධ කතා නිර්මාණය කරමින් තිබෙනවා. අපි පසුගිය කාලයේ ගොවිජන සම්මේලනය ලෙස වී මිල ගැන කතා කළා. අපි ආණ්ඩුව බාරගන්න කලින් වී කිලෝ එකක නිෂ්පාදන මිල රුපියල් 99.75 යි. ඒ කාලයේ වී මිලදී ගත්තේ නෑ. එදා ගොවියාට සාධාරණයක් වුණේ නෑ. ගොවීන් අඩු මිලට වී වික්කා.
අපි මෙවර විද්‍යානුකූලව වී මිල නියම කළා.රතු නාඩු නිෂ්පාදන වියදම රුපියල් 75යි. පාලන මිල රුපියල් 120යි. ඒ අනුව රුපියල් 45ක ලාභයක් තිබෙනවා. අපි ගෙනාපු සටන් පාඨයට පණපොවලා තිබෙනවා. ඒ වගේම තෙත වීවලට මිලක් තිබුණේ නෑ.
තෙත වීවලටත් අපි මිලක් නියම කරනවා. නාඩු කමතේ රුපියල් 102යි.නිෂ්පාදන වියදම රුපියල් 60යි. සම්බා කමතේ රුපියල් 105යි.නිෂ්පාදන වියදම රුපියල් 79යි. අපි ගොවියා ආරක්ෂා කළා.
අපි ගොවීන්ට කියන්නේ අඩු මිලට වී දෙන්න එපා. රජය වී මිලදී ගන්න සූදානම්. වී මිලදී ගන්න අයත් අඩුවට ගන්න එපා. ගබඩා ඇරලා නෑ කියා අසත්‍ය ප්‍රවාර පැතිරෙනවා. ගබඩා බොහෝමයක් ඇරලා තිබෙනවා. ගොයම් කපන ප්‍රදේශවල ගබඩා විවෘත කරන්න කියා උපදෙස් දී තිබෙනවා.
ගොවියාගේ වී වලට සාධාරණ මිලක් අද නියම කළා. නිෂ්පාදන වියදම අපි ගණන් හැදුවා. ඒ නිෂ්පාදන වියදමට 30% ක් අපි එකතු කළා.
වී මිලදී ගැනීමේ මිල වැඩි කළත් අපි පාරිභෝගිකයා ගැනත් හිතන්න ඕනෑ. අපි රජයක් ලෙස තීන්දු ගන්නේ පාරිභෝගිකයා, අතරමැදියා සහ ගොවීන් තුන් කට්ටියම ගැන හිතලයි. අපි ආණ්ඩුව ගත්තම වගා හානිවලට වන්දි ගෙව්වා. වගා වන්දි ගෙවලා අවසන් කර තිබෙනවා. හාල් වෙළෙඳපොළේ කවුරුහරි අලකලංචියක් කරන්න හදනවා නම් අපි ඒකට ඉඩ දෙන්නේ නෑ. අපි ගත්ත වී තොග ඇපයට තියලා බැංකු සමඟ ගනුදෙනුවකට යන්නත් පුළුවන්. රටින් ගේන ආහාර සම්බන්ධයෙන් අවධානය යොමු වෙලා තිබෙනවා. ආහාර රටින් ගේන එක අවම කරගැනීම සහ නවත්වාගැනීම අරමුණක්. එහෙම කරන්න නම් අපි නිෂ්පාදනය වැඩි කරන්න ඕනෑ. ගොවියා යම් යම් පීඩාවන්ට පත්වේවි. ඒක නිරාකරණය කරන්න ඕනෑ.
අපි බඩඉරිඟු මිලදී ගන්නවා. මුංඇට ප්‍රවර්ධනය කරනවා. රජය මිලදී ගන්නත් සූදානම් වෙනවා. එතකොට වෙළෙඳපොළ ප්‍රශ්නය නිරාකරණය කරගන්න පුළුවන්. ඒ වගේම සුළු අපනයන බෝග වගා කරන අයට විශේෂ ආධාර වැඩසටහන් නිර්මාණය කර තිබෙනවා. බඩ ඉරිඟු ප්‍රශ්නය අපි අවසන් කරනවා. නමුත් එකවරම එය කළ නොහැකියි. කන්තලේ අතහැරපු ඉඩම් දැන් වගාබිම් බවට පත්වෙමින් තිබෙනවා.රජය විසින් බඩඉරිඟු මිලදී ගැනීම ආරම්භ කරන්නත් සූදානම්’ යැයි ද නියෝජ්‍ය ඇමැතිවරයා වැඩිදුරටත් පැවසූවා.
