ශ්රී ලංකා හොකී පිල ආසියානු උලෙළට සුදුසුකම් ලබයි
තායිලන්තයේ බැංකොක් නුවර පැවැත්වෙන ආසියානු ක්රීඩා උලෙළේ පිරිමි හොකී සුදුසුකම් ලැබීමේ තරගාවලියේ ‘බී’ කාණ්ඩයේ පෙරමුණ ගත් ශ්රී ලංකා හොකී පිල මේ වසරේ සැප්තැම්බර් මාසයේ ජපානයේ නගෝයාහි පැවැත්වෙන ආසියානු ක්රීඩා උලෙළට සුදුසුකම් ලබා ගත්තා.
වසර 20කට පසු බංග්ලාදේශ ජාතික හොකී කණ්ඩායම ගෝල 3 – 2 කින් හා වසර10කට පසු උස්බෙකිස්තානය ගෝල් 3 – 1කින් පරාජය කරමින් ශ්රී ලංකා පිල මේ සුදුසුකම් ලැබීමේ තරගාවලියේදී ඉදිරියට පැමිණියා.
මූලික වටයේ අවසන් තරගයේදී ශ්රී ලංකා පිල චීන තායිපේ හමුවේ ගෝල් 3 – 1ක පරාජයක් ලැබූ අතර, හෙට (9) අවසන් පූර්ව වටයේදී ඉන්දුනීසියාව සමඟ තරගයට පිවිසෙනවා.
ශ්රී ලංකාව හා ඉන්දුනීසියාව මෙයට පෙර 2018 වසරේදී ඉන්දුනීසියාවේ ජාකර්තා නුවරදී අවසන් වරට මුණ ගැසුණ අතර එහිදී 3 – 1කින් ශ්රී ලංකා පිල ජයග්රහණය වාර්තා කළා.
එබැවින් අද තරගය ජයගෙන මේ 10 වැනිදා පැවැත්වෙන අවසන් මහා තරගයට පිවිසීමේ වැඩි බලාපොරොත්තු ශ්රී ලංකා හොකී ක්රීඩකයෝ රඳවාගෙන සිටිනවා.
2006දී කොළඹ පැවති දකුණු ආසියානු ක්රීඩා උලෙළේදී ලෝකඩ පදක්කම සඳහා වූ සටනේදී බංග්ලාදේශය ගෝල් 2-0කින් ශ්රී ලංකාව හමුවේ පරාජය වූ අතර, එතැන් සිට හමු වූ සෑම අවස්ථාවකදීම බංග්ලාදේශ හොකී පිල ඉදිරියෙන් සිටියා.
එහෙත් මෙවර හමුවීමේදී 6 වැනි මිනිත්තුවේදී සෙරාන් බොතලේ ගෝලයක් ලැබූ අතර, 16 වැනි හා 49 වැනි මිනිත්තුවලදී කුසල් වීරප්පුලි හා සුරේෂ් රත්නායක ගෝල් ලබා ජය තහවුරු කළා.
උස්බෙකිස්තානයට එරෙහි තරගයේදී ධම්මික රණසිංහ ගෝල් 2ක් හා කුසල් වීරප්පුලි ගෝලයක් වාර්තා කිරීමට සමත්වූ අතර, චීන තායිපේ පිලට එරෙහි තරගයේදී ඩේමියන් කරුණාමුනිගේ ගෝලයක් එක් කළා.
මේ තත්ත්වය මත ධම්මික රණසිංහ හා කුසල් වීරප්පුලි ශ්රී ලංකාව වෙනුවෙන් මෙතෙක් ගෝල් 2 බැගින් ලබා පෙරමුණ ගෙන සිටිනවා.
ශ්රී ලංකා හොකී කණ්ඩායමට යුද හමුදා හොකී ක්රීඩක ධම්මික රණසිංහ නායකත්වය දෙන අතර, හිටපු ජාතික පිලේ ක්රීඩක රිෆාස් මොහොමඩ් මහතා ශ්රී ලංකා හොකී පිලේ පුහුණුකරු ලෙස කටයුතු කරමින් සිට්නවා.
